Name: Neni
Website: neni.ch
Location: Pfingstweidstrasse 102, 8005 Zürich
Wer nöd mit em Tram chunnt hät me als vörig Platz zums Fixie parkiere, am beste chetted mer’s grad a dere hypnotisierende silbrige Statue uf em Platz vom Hardturm Park aa. S Neni sälber isch nöd direkt aagschribe, de Iigang befindet sich im nördliche Egge vom Platz.
Leider sind weder d Absperrige no de Roti Teppich parat gsii wo mir iitrudlet sind. Das git ganz klar Minuspünkt, kein guete Start für de hipsterlunch im Neni ;).
Reserviere isch im Neni i eusem Fall irritierenderwiis nöd möglich gsii, da anschiinend no irgend en Model Event stattfändi. Gross beunruhiget hät eus das nöd, da s typische Model ja eh chuum was zue sich nimmt (und bhaltet), entsprechend hät im Neni gähnendi leeri gherrsch wo mir am Iisatzort ufgschlage sind.
Uf em Weg nach ine lauft mer ame Pingpong Tisch verbii. Es isch also nöd nötig s Neni scho mit energischem Kohldampf z betrete, mer cha sich au no schnäll ustobe damit mer au würklich Hunger hät.
Nachdem mer denn die letschte Kalorie vom morgendliche Starbucks Double Ristretto Venti Half-Soy Nonfat Decaf Organic Chocolate Brownie Iced Vanilla Double-Shot Gingerbread Frappuccino Extra Hot With Foam Whipped Cream Upside Down Double Blended, One Sweet’N Low and One Nutrasweet, and Ice abgstramplet und de Bart neu sortiert händ, simmer denn äntlich ine.
Uf de ersti Blick hät das Lokal eher enttüschend, zu modern, usgseh. Uf de zweiti Blick mags überzüge mit interessante Stüehl und Barhocker. Die grosse runde Tisch sind ideal für e 8er Gruppe wie mir, mer hät jede im Blick und mues nöd wie üblich quer über de Tisch lehne damit mer de Klasseclown am andere Endi no verstaht.
D Mittagscharte isch riesig (ca. A3) und es stönd einigi unüblichi Spiise zur Wahl wie de Jerusalem Täller mit Poulet, Hummus, Zwieble, Peperoni und Pitabrot – aber es git au langwiiligs wie Entrecôte mit Riis – oder natürlich de Klassiker wie de Burger.
Als Gazosafan han ich d Getränkecharte sehr speziell gfunde, dass vo dene ca. hundert Gschmäcker s doch usgrächnet mirtillo ufd Charte gschafft hät.
Aber wie jede guet sortierti hipsterlunch schuppe hät au s Neni ihren eigene Iistee, stilecht serviert ide Bügelfläsche. Bonuspünkt gits fürd Etikettierig und de extra ufwand für en Stämpel.
Fürd Gläser hämer eigentlich scho welle Abzug geh wills kei Konfigläser sind. Allerdings sind die sooo alt, die chönnted vo mim Grossmami sii, und gsehnd au entsprechend abgnutzt uus, das git sogar nomal Extrapünkt.Konfigläser tischt ja hüt scho fängs jede als Trinkgläser uuf, da muemer sich halt was neus alts iifalle lah!
Während em Warte ufs Ässe isch de Iistee schomal zügig verdunstet und mir händ eus übers Brot her gmacht. De grüeni Brotufstrich im Hintergrund isch, so d legände, Oliveöl und im Vordergrund isch en Chrüterufstrich. Verdikt neutral, Abzüg für plain old Oliveöl und Brot usem Migros, Bonuspünkt für de Ufstrich.
D Warteziit bis s Ässe serviert worde isch, isch voll ok gsii. De Burger mit em selber hergstellte patty is sehr guet aber gschmacklich irgendwie chli langwiilig gsii, es fählt no es pünktli uf em i. Die us süessherdöpfel gmachte und minimal gsalzene Pommes Frites sind super gsii und verleihed dem Gricht als ganzes no e chli Gschmack und rundet das Ganze ab.
Alles in allem isch s Neni bsuech Wert.
Euses Herz schlaht im Vierte vo Föif Fixie-Gäng fürs Neni.
[usr 4]